Былырыын ыытыллыбыт түмүктэн быйыл «куобахтаан ойуу», «ох саанан ытыы» көрдөрүүтэ тупсубутун бэлиэтээтилэр. Бары уһуйаан физруктара иитиллээччилэрин күүскэ бэлэмнээн, күрэххэ аҕалбыттара үчүгэй көрдөрүү буолла.
Күрэх кыайыылаахтара
- Михайлов Эрчимэн, «Чуораанчык», Мугудай;
- Бомбоев Айсаан, «Кыталык», Чурапчы;
- Данилов Эрчим, «Туллукчаан».
Биһиги уһуйаантан Баир Птицын кыттан кэллэ. Кини үс төгүл куобахтаан ыстаныыга муҥутуур кыайыылаах тахсан, анал бириистээх.
Атын да көрүҥнэргэ үчүгэй бэйэтин кыаҕынан көрдөрүүлэри ситиһэн икки эрэ очкуонан хаалан 15 кыттааччыттан уопсай түмүккэ төрдүс миэстэ буолла.
Оҕолор бары да күүстээхтик бэлэмнэнэн кэлбиттэр, ол иһин күрэхтэһии интэриэһинэйдик, тыҥааһыннаахтык барда.
Биһиги Баиры бэлэмнээбит тренербитигэр, төрөппүттэригэр махталы тиэрдэбит, өссө да буолаары турар улууска байыаннай хаамыыга+спорт эстафетаҕа - «Мохсоҕол» күрэххэ уонна дуомат күрэхтэһиилэригэр Баирга өссө үрдүк ситиһиилэри баҕарабыт.
Саргылаана КУЗЬМИНА,
«Ымыы» оҕо сайдар киинин иитээччитэ,
Мындаҕаайы, Чурапчы
