Кемеровоҕа спорду өрө туталлар. Үгүс көрүҥнэринэн дьарыктаналлар, элбэх Олимпийскай уонна аан дойду чөмпүйүөннэрдээхтэр, призердардаахтар. Киһи мунар аарыма Кузбасс Муус Дыбарыаһыгар дьон толору мустубута да ону кэрэһэлээтэ. Россия Президенин бэрэстэбиитэлэ Анатолий Серышев, Росссия спордун миниистирэ Олег Матыцин, Кемеровскай уобалас губернатора Сергей Цивилев, Норуоттар икки ардыларынааҕы “Азия оҕолорун” кэмитиэтин Президенэ Владимир Максимов эҕэрдэлээтилэр.
Олимпийскай оонньуулар фигурнай хаҥкылааһыҥҥа чөмпүйүөннэрэ Алексей Ягудин, Евгений Плющенко, Олимпиада үрүҥ көмүс призера Александра Трусова кыттыыны ыллылар. Василий Степанович Парников салайааччылаах Уус-Алдан улууһун “Кэнчээри” ырыа народнай ансаамбыла “Азия оҕолорун” гимнин английскайдыы, нууччалыы, сахалыы ыллаан ньиргиппитэ биһиэхэ, сахаларга, киэн туттууну, долгуйууну үөскэттэ. Омук дойдуларын уонна Россия регионнарын спортсмен оҕолорун ортолоругар Сахабыт сирин халыҥ хамаандата параакка кыттан хаампыта көрөргө үчүгэй буолла!
Араас түмэр-көҕүлүүр дьаһаллар хараан көрбөккө күннэтэ ыытыллаллар. Сахабыт сирин делегацията көхтөөхтүк кыттар. Өрөспүүбүлүкэбититтэн 50-ча суруйар-бичийэр, кэпсиир-ипсиир, көрдөрөр-иһитиннэрэр, суруналыыстар тиийэн үлэлии сылдьаллара спорка суолта бэриллэрин быһыытынан сыаналыахха сөп.
“Саха” НКИХ Генеральнай дириэктэрэ Олег Олегович Марков Оонньуулары үрдүктүк сыаналаата: “Сахабыт сиригэр “Азия оҕолорун” Оонньууларын таһыма олус үрдээн кыһыҥҥы оонньуулар эбии тэриллэннэр, Кузбасска ыытылла тураллар. Үөрүүлээхтик аһыллыытын көрдөххө, олус үрдүк таһымнаах. Ол курдук, церемонияны иилээн-саҕалаан фигурнай хаҥкылааһыҥҥа Олимпийскай чөмпүйүөн Алексей Ягудин бэйэтэ ыытта, Олимпийскай оонньуулар кыайыылаахтара Евгений Плющенко, Александра Трусова кыттыылаах Оонньуулар аһыллыбыттарыттан мин олус үөрдүм уонна астынным. Кырдьык даҕаны, билигин Оонньуулар таһымнара олус үрдээтэ. Түөрт сыл анараа өттүгэр бастакы кыһыҥҥы Оонньуулар Сахалин куоракка ыытыллыбыттара, онно биһиги хампаанньабыт олохтоох Сахалин теле-хампаанньатын кытта Оонньуулары сырдатаммыт кыһыҥҥы көрүҥнэри сырдатыыга улахан уопут ылбыппыт. Түөрт сыл ааспытын кэннэ Оонньуулар таһымнара үрдээбитин “Матч-ТВ” федеральнай канал сырдатара да туоһулуур. “Матч-ТВ” кытта биһиги дуогабар түһэрсэммит, Оонньуулары сырдатыыга бииргэ үлэлэһэбит. Кемероваҕа “Саха” НКИХ канаала үлэлиир, икки улахан көһө сылдьар ПТС-каларбытын аҕаллыбыт. “Матч-ТВ” эмиэ икки ПТС-х, онон түөрт куораттарынан көһө сылдьар, эфииргэ быһа тахсар телевидениелэр үлэлииллэр. Саха сириттэн 35 үлэһит кэлэн үлэбит саҕаланна. Биллэн турар, маннык улахан тэрээһиҥҥэ, улахан профессиональнай тэрилтэлэри кытта бииргэ үлэлиир биһи хампаанньабытыгар улахан уопут биэрэр”.
Саха Өрөспүүбүлүкэтин физическэй культураҕа уонна спорка миниистирэ Леонид Спиридонов, Ил Түмэн депутата, физическэй культураҕа уонна спорка Сис кэмитиэтин бэрэссэдээтэлэ Михаил Гуляев, “Монреаль-1976” Олимпийскай оонньуулар көҥүл тустууга чөмпүйүөнэ Павел Пинигин, “Пекин-2008” Олимпийскай оонньуулар боксаҕа боруонса медалиһа Георгий Балакшин, Саха сирин художественнай гимнастикаҕа президенэ Людмила Николаева Өрөспүүбүлүкэ сүүмэрдэммит хамаандатын оҕолорун кытта көрүстүлэр, алгыстарын анаатылар. Сүүмэрэдэммит хамаанда хапытаана, хайыһардьыт Инна Рыбкина хамаанда аатыттан ситиһиилээхтик кыттарга андаҕар тыл эттэ.
Хоккеистарбыт күүстээх “А” бөлөххө бааллар. Дальнай Восток, Кузбасс, Казахстан хамаандаларын кытта утарыта киирсиэхтээхтэр. Маҥнайгы оонньууга олохтоох Кузбасстары кытта тэҥ оонньууга, шайбаны воротааҕа таба охсон киллэриигэ 4:3 буллитынан хоттулар. Нөҥүө күн Казахстан хамаандатыгар 11:0 лаппа баһыйтардылар. Кыайтарыы төрүөтүн хоккей оскуолатын салайааччылара быһааралларынан, биһи хоккеист оҕолорбут күүстээх Кузбасс хамаандатын кыайаннар аһары үөрбүт буолуохтарын сөп уонна Казахстан хамаандата Дальнай Востоктарга хотторбутуттан аһары эрдийбит, киирсииһикпит диэн, аһары уоскуйбут, бэйэлэрин кыахтарыгар аһары эрэммит буолуохтарын эмиэ сөп. Бэнидиэнньиккэ салгыы миэстэ иһин киирсэргэ кыаҕы үөскэтэр Дальнай Восток хамаандатын кытта оонньууллар.
Фигурнай хаҥкылааһыҥҥа кыргыттарбыт 24 кыттааччыттан 10 уонна 15 миэстэҕэ, уолаттарбыт 8 уонна 12 миэстэлэргэ иһэллэр.
Кемеровоҕа “Азия оҕолорун” кыһыҥҥы спортивнай оонньуулара салҕаналлар
Баһылай Посельскай
