Бу үүммүт саҥа сылга бастакы күрэхтэһиинэн бильярдка хамаанданан Баһылык кубога буолан ааста. Маннык күрэххэ ыраах сытар Улахан Чыыстай нэһилиэгиттэн икки хамаанда кэлэн кытыыны ылбытын тоҕоостоох. Оттон Индигир нэһилиэгэ биэс хамаанда хомуйан туруорбута, бу нэһилиэккэ бильярд сайдыытыгар болҕомто ууруллара көстөр диэн сыаналыахха сөп. Уонна оскуола оҕолорун аҕалан оонньотоннор манна мустубут дьон сэҥээриилэрин ылыан ыллылар. Оҕолор да, сэргэх оонньууну көрдөрөн, аҕа табаарыстарын түһэн биэрбэтилэр.
Күрэхпитигэр төннүөххэ. Ооонньуулар икки улахан остуолга бардылар. Оройуон киинигэр биир остуол баар этэ, диир буоллахха, бу аҕай иннинэ, оройуон бильярдка федерациятын салайааччыта Пр.С.Федоров уонна Индигир нэһилиэгин федерация председателэ А.М.Хадаров тус бэйэлэрэ сүүрэн-көтөн, Дьокуускай куораттан 200 тыh. суумалаах улахан остуолу, бэйэлэрин массыыналарынан аҕалан туруордулар. Оройуоҥҥа бильярд спорда сайдыытыгар Прокопий Семенович оруола сүҥкэн, онон биһиги хаһыат нөҥүө улахан махталбытын биллэрэбит, дьолу-соргуну, кытаанах доруобуйаны, үтүмэн үгүс ситиһиилэри баҕарабыт. Остуол күрэх кэннэ Индигиргэ барыахтаах. Тэҥнээн көрдөххө, мин харахпар, оонньуу таһыма балачча ылларыылаах хардыыны иннин диэки оҥорбут. Тоҕо диэтэр үгүс оонньуулар 3 партияны толору бардылар, уонна ахсаан 8 : 7 түмүктэннилэр. Соһуччу көрдөрүү суох диэххэ сөп, гынан баран барыллааһын оонньууларга Индигир-4 (Никулин Коля, Атласов Данил, Слепцов Рома) оскуола оҕолоро, бэйэлэрин аҕа табаарыстарын, Индигир-2 хамаанданы хоттулар. Ити хотторуулара Индигир-2 хамаандатыгар тэбиилээх буолла, аныгыс көрсүһүүлэригэр Улахан Чыыстай-2 түбэһэннэр букатын да көрөөччү буолар чиэскэ тигистилэр, ол да буоллар хомойуу манна сыта суох. Оҕолорбут биһигин кытта тэҥҥэ оонньоһор буолбуттар, мантан антах дьэ кимиэхэ баҕар ыарахан таһаҕас буолсулар, диэн санаалара бөҕөх.
Финалга ыраах Улахан Чыыстай нэһилиэгиттэн кэлбит икки хамаанда оонньооннор бачча ыраахха ыра санаа оҥостон кэлбит баҕалара туолан үөрүүлэрэ сүрдээх. Кыайыылааҕынан Улахан Чыыстай-1 (Слепцов Александр, Черемкин Кирик, Лебедев Петр) хамаанда кыайан көһө сылдбар кубогы эһиил баччаҕа дылы илдьэ сылдьар быраабы ылла. Бу хамаанда туһунан этэр буоллахха, оонньооччуларын оонньуур таһыма тэҥ баайыылааҕа, хамаанда бастыырыгар быһаарыылаах буолла диэтэхпинэ сыыспатым буолуо. Иккиһи эмиэ бу нэһилиэк иккис хамаандата (Парилов Андрей, Соркомов Прокопий, Тихонов Дьулус) ыллыалар. Үһүс бочуоттаах миэстэ иһин киирсиигэ, Хонуу-1 уонна Индигир-1 хамаандалара ооньоотулар. Манна бэрт сытыы киирсиигэр Индигир-1(Андросов Владимир, Иванов Николай, Слепцов Геннадий) хотон үһүс миэстэни ылла. Хонуулар санааларын түһэрбэттэр, аны олунньу ыйга дьэ киирсиэхпит, хайаан да кэлээриҥ диэн ыҥыра хааллылар.
Үһүс күҥҥэ күрэх муҥутуур кыайыылааҕын быһаарар оонньууларга 17 киһи суруттарда. Манна мин тэрийсээччи быһыытынан, биири хайҕыы көрдүм. Ол курдук Индигир нэһилиэгин биир күүстээх оонньооччута, Андросов Владимир Владимирович, оскуола оҕотугар бэйэтин хармааныттан, күрэххэ киирэр усунуоһун төлөспүтэ, бу кини кырдьык төрөөбүт нэһилиэгим ыччата дэгиттэр сайдыылаах буоларыгар дьиҥнээхтик ыалдьарын туоһута буолар. Манныкка киһи үөрэр эрэ. Манныгы мин кэлин хас да күрэххэ бэлиэтии көрдүм. Бу тапталлаах оройуоммут дьоно-сэргэтэ чөл туруктаах, чэгиэн чэбдик олоҕу инники күөҥҥэ туталларыттан буолуо дии саныыбын. Оттон Индигир нэһилиэгиттэн Андрей Хадаров бу күрэх саамай табыллыбыт оонньооччутунан буолла. Тоҕо диэтэр сэрэбиэй киниэхэ эрэ наар үчүгэй хараҕынан көрдө диэххэ сөп. Финал аҥаарыгар диэри кинини араҥаччылаан иккитэ сынньанан тиийдэ. Онон Андрей финал аҥаарыгар биирдэ баар буола түстэ. Манна кини Улахан Чыыстайтан соҕотоҕун хаалбыт эдэр кэскиллээх оонньооччуну Петр Лебедевы баһыйа тутан финалга таҕыста. Оттон кинини утары Инидигиртэн Иванов Николай арыый күүстээх сеткаттан таҕыста. Тоҕо диэтэр кини билиҥҥи кэмҥэ оройуон күүстээх оонньооччуларын барыларын кэриэтэ көрүстэ. Хамаанданан күрэх финальнай оонньуутугар, икки Улахан Чыыстай хамаандалара оонньообут буоллахтарына, муҥутуур кыайыылааҕы быһаарар киирсиигэ, икки Индигир оонньооччулара кииристилэр. Туһугар эмиэ дьикти түгэн диэххэ сөп. Бу оонньууга Иванов Николай элбэх тыҥааһыннаах оонньууну ааспыт буолан дуу, эбэтэр арыый бэлэмнээх буолан дуу, бэрт судургутук 2:0 ахсаанынан кыайан, күрэх муҥутуур кыайыылааҕынан уонна харчынан бириэмийэ тутта. Иккис-үһүс миэстэлэргэ туһааннааҕынан Хадаров Андрей (Индигир) уонна Лебедев Петр (Улахан Чыыстай) таҕыстылар. Турнир кэскиллээх оонньооччутунан Индигиртэн Атласов Данил буолла. Анал бирииһи Хонуу нэһилиэгин бильярд спордун федерациятын салайааччы Слепцов В.Н. тутта. Оттон Оһикат ЭКК бэйэтин анал бирииһин Индигиртэн Уваровскай Мичилгэ туттарда.
Ити курдук бильярд спордун биир сонун күрэҕэ олус тыҥааһыннаахтык, көрөөччү кыттаачы эрэ астынар гына буолан ааста. Спортсменнар аны кэлэр ыйга күрэххэ кыттыах буолан тарҕастылар.
Чөл туруктаах этэҥҥэ буолуҥ.
А.Слепцов
