Кинини кытта оҕо эрдэхпититтэн бииргэ оонньоон, үгүспүт биир интэринээккэ олорон, биир кылааска үөрэнэн, үгүс күрэхтэһиилэргэ бииргэ сылдьан, онтон кэлин олох оҥостон, ыал буолан, дьиэ тэринэн, оҕо-уруу тэнитэн олорор кэммитигэр үлэ-хамнас да быыһыгар элбэх бырааһынньыктары, үөрүүлээх түгэннэри бииргэ бэлиэтиирбит. Ол тухары тула эргичийэр кииммитинэн наар Славик буолара. Уоллуун-кыыстыын кини кэпсээнин истэрбит, дьаһалын биир мөккүөрэ суох ылынарбыт. Оскуола саҕаттан билэрэ-көрөрө да элбэҕэ, бэрт интэриэһинэйдик араас дьээбэлээҕи-көрдөөҕү кэпсиирэ, бастакы анекдоттары арааһа эмиэ киниттэн истибиппит буолуо. Сытыы тыллаах бэртээхэй кэпсээнньит, бэйэтэ да сүрдээх юмордаах буолара.
Оччолорго биһиги оскуолабытыгар Д.П.Коркин дьарыктыыр уолаттара үөрэнэллэрэ, анал спортивнай оскуола өссө аһылла илигэ. Араас оройуоннартан талыллан кэлбит тустуук уолаттары кытта бары биир интэринээт дьиэҕэ олорорбут. Оскуола мастарыскыайыгар сыһыары тутуллубут биир Беларуус тыраахтар киирэр гарааһын тустуу саалата онорон, тилэри маат тэлгээбиттэригэр, үөрэхтэрин быыһыгар сарсыардаттан киэһээҥҥэ диэри тустан хачымахтаһаллара. Сотору-сотору араас күрэхтэһиилэргэ кыттан кыайан-хотон кэлэллэрэ. Слава улахан кыайыылара оччолорго өссө кэлэ иликтэрэ, кини эмиэ күрэхтэһиилэргэ сылдьара, балачча уһуннук сбордарга барара. Онно сылдьан ол кэмнээҕи саҥа муодунай ырыалары билэн кэлэн биһиэхэ ыллаан иһитиннэрэрэ. Кини бэркэ ыллыыра, ордук кавказтар ырыаларын, восточнайдары. Атын уолаттар ыллаабат этилэр, бары кини тула мусталлара, саҥа ырыатын истэллэрэ.
Оскуола эрдэхтэн кини сытыы өйүнэн, санаатын чуолкайдык этэринэн, кимтэн да куттанан, тардынан турбатынан ураты буолар этэ. Биирдэ 9-с дуу 10-нус дуу кылааска үөрэнэ сылдьан Обществоведение уруогар учууталбытыгар Хрущев, Партия ыытар политиката норуот кыһалҕатын дөксө дириҥэтэр, сыыһа диэн мөккүспүтүгэр, учууталбыт бокуойа суох директорбытын ыҥыран аҕалааччы буолбута. “Уруогу сүгүн ыыттарбаттар, партия политикатын кириитикэлииллэр” - диэн буолла. Директор киирбитигэр Слава Карпов паартатыттан туран кэллэ уонна “Гаврил Дмитриевич, дьэ эн партия эрэллээх чилиэнэҕин. Ама эн ити холкуостаахтарга биирдии эрэ ынаҕы кэтэх туталлара көҥүллэнэр диэн Партия ыйыытын кытта сөпсөһөҕүн дуо? Оччоҕо элбэх дьиэ кэргэннээх ыал (оччолорго ыаллар элбэх оҕолоох, эбэлэрин-эһэлэрин илдьэ олорор буолаллара) оҕолорун-урууларын тугунан аһатан-сиэтэн иитэллэр?” - диэн быһаччы боппуруос биэрээччи буолбута. Директорбыт демократическай централизм диэн баарын билэҕит, онон төһө да сөбүлэспэтэрбин, меньшинство подчиняется большинству диэнинэн сирдэтэбин диэн тэҥнээхтэр кэпсэтиилэрин курдук буолан бары уоскуйбуппут. Онтон сотору кэминэн Хрущеву үлэтиттэн устубуттара, партия политиката уларыйбыта. Уопсайынан, Слава туохха барытыгар киэҥ, дириҥ көрүүлээҕэ, билиилээҕэ, үөрэтэр предметтэрбитигэр барытыгар тэҥ, чиҥ билиилээх этэ.
Уон биирис кылааһы бүтэрэрбитигэр, уолаттарбыт бары саллааттыы барбыттара, арай Славик 18 сааһын туола илик буолан бэбиэскэ туппатаҕа. Дьэ уонна ол сайын сахалартан бастакынан уолаттарга Сэбиэскэй Союз чемпиона буолбута. Онтон утуу-субуу араас күрэхтэргэ СССР-га, Россияҕа, Саха сиригэр, ол быыһыгар кыраныысса таһыгар да, улахан кыайыылар кэлитэлээбиттэрэ. Биһиги бары араас куораттарынан үөрэнэ, сулууспалыы сылдьар буолан аттыгар суохпут, суругунан эҕэрдэлэһэрбит, ыраахтан киэн туттарбыт.
Уруйдааһын-айхаллааһын, көрсүһүүлэр-сууйуулар сир-сир аайы элбээбиттэрэ. Бэйэтин “Ат өрөҕөтүнэн, уорҕатынан олох”(2011с.) диэн ахтыы кинигэтигэр суруйбутун курдук ол кэмнэргэ, саҥа “атастара-доҕотторо” элбээбиттэрэ, араас күннэр-дьыллар субуһан ааспыттара... Олох аһыытын-ньулуунун, түһүүтүн-тахсыытын барытын бэйэтин күөнүнэн тэлбитэ, быыһыгар тустан кыайталаан Карпов дуо дэтэрэ. Бэйэтэ суруйарынан, олох дьэбэрэтигэр түһэ сылдьан олоххо тардыһыыта баһыйан, бэйэтин бэйэтэ эрэ өрө тартаҕына киһи буоларын өйдөөн, кытаанах биир быһаарыныы ылыммыта уонна ол быһаарыытын олоҕун тиһэх күннэригэр дылы булгуруппатаҕа. Ама да ааспытын иһин, ол кэмнэри санаатахха, үгүс да ыччат, ол иһигэр, ара чаҕылхай талааннаахтар, олохторун суолун сыыһа үктээн, кыайан көммөккө, өрө тардыммакка, олох олорбокко бараахтаабыт эбит...
Ити үөһэ ааттаабыт кинигэтин кытаанах санаалаах, олоҕу дириҥник сыаналыыр киһи буолан эдэр ыччаттарга анаан бэйэтин олоҕун түһүүтүн-тахсыытын туһунан туох да тупсарыыта, кырааската суох хайдах баарынан кырдьыктаахтык суруйбута туһунан хорсун быһыы курдук сыаналаныан сөп. Киһи бэйэтин сыыһатын-халтытын итинник аһаҕастык суруйара эмиэ чэпчэкитэ суоҕа биллэр. Ону кыайан, ол иһин улаханнык убаастанар киһи, аптарытыаттаах үлэһит, дьон-сэргэ, доҕор-атас куруутун тардыһар элбэх ыалдьыттаах-хоноһолоох, оҕолоох-уруулаах дьиэ кэргэн хаһаайына, аҕа, эһээ, истиҥ доҕор Вячеслав Павлович буолан олорон ааста. Республика үтүөлээх үлэһитэ, Улуу тренерэ Д.П.Коркин аатынан государственнай бириэмийэ биир бастакы лауреата, Чурапчы улууһун бочуоттаах олохтооҕо, үгүс элбэх наҕараада, билинии кини олоҕун ситэрэн биэрдэ.
Кини биир кылааска үөрэммит Таня Федорованы кэргэн ылан 50-ча сыл бииргэ олорбуттара. Татьяна 8-с кылаастан ыла старостабыт (ол солотун баччааҥҥа дылы бары билинэбит). Карповтарга куруутун мустан, көрсөн Слава кэпсээнин, ырыатын истэн, күө-дьаа кэпсэтэн, дэлби үөрэн-көтөн, күлсэн тарҕаһааччыбыт. Кинилэри кытта бэйэбит эрэ олохпутугар араас быһаарыныы ыларбытын сүбэлэһэр, сүбэлэтэр буолбатахпыт, кэлин аны оҕолорбут, сиэннэрбит гиэннэрин кытта. Онно Вячеслав Павлович этиитэ, быһаарыыта саамай ылыннарыылаах буолара.
Саныыбыт, суохтуубут...Славка...
Оскуолаҕа бииргэ үөрэммит доҕотторо.
