Ааспыт дьыл ахсынньы 12 күнүгэр ыраас халлааңңа этиң эппитинии, мас тардыһыыга Саха сирин, Россия спордун маастара, тапталлаах кэргэн, икки оҕо амарах аҕата, Уус-Алдан улууһун Танда нэһилиэгиттэн төрүттээх Готовцев Семен Гаврильевич олус соһуччутук быстахха былдьаммыт ыар сураҕа барыбытын аймаабыта, сурэхпитин хайыппыта, уолуппута. Доҕорбут муус анныгар хаалан, хас да күн көстүбэккэ дууһа айманар, сурэх ытыыр-ыгылыйар күннэрэ-дьыллара тирээн турбуттара. Саха сирин быыһыыр сулууспата, Мэҥэ-Хаҥалас улууһун Дьаҥхаады нэһилиэгин, Уус-Алдан улууһун Танда нэһилиэгин дьоно-сэргэтэ, мындыр толкуйдаах Төхтүр оскуолатын техническай киинин үлэһиттэрэ, үгүс элбэх киһи көмөтүнэн буланнар һуу диэн уоскуйуу буолбута. Номнуо 40 хонуга туола оҕуста.
Готовцев Семен Гаврильевич атырдьах ыйын 11 күнүгэр 1988с Сунтаар оройуонун Маар-Күөл бөһүөлэгэр Евдокия Николаевна, Гаврил Данилович Готовцевтар дьиэ – кэргэҥҥэ үһүс оҕонон күн сирин көрбүтэ. Оҕо эрдэҕиттэн олус сэмэй, сырдык санаалаах, дьоҥҥо эйэҕэс, амарах сыһыаннаах этэ.
1989 сыллаахха Уус-Алдан улууһугар Танда бөһүөлэгэр көһөн кэлбиттэрэ. 1995 сыллаахха Танда орто оскуолатын боруогун атыллаабыта. Оскуолаҕа үөрэнэр сылларыттан олоҕун бүтэһик күнүгэр дылы спортка, сүрүннээн мас тардыһыытыгар элбэҕи ситиспитэ, нэһилиэгин, улууһун, өрөспүүбүлүкэтин аатын чиэстээхтик көмүскээбитэ. Тренерэ, Саха республикатын Үтүөлээх тренерэ Иван Степанович Готовцев утумнаахтык дьарыктаан күрэхтэһиилэргэ кытыннаран өрүү миэстэлэһэр. “7-с кылааска миэхэ дьарыктана кэлбитэ. Олус килбик, сэмэй уолчаан этэ. Дьэ ол гыннар помостка олордо, тардыһар маһы тутта да, атын Сэмэн буолара. 10-с кылааһы бүтэрэн баран Танда нэһилиэгин ыһыаҕар 65 киилэлээх уол, 75 киилэҕэ дылы улахан уолаттары кыайталаан бастаан дьонун үөрдэн турар. Дьарыкка оҕо да сылдьан, кэлин да олус эппиэттээхтик сыһыаннаһара. Сыбаайбалаат республикаҕа 82 киилэҕэ бастаабыта. Уус Алдан хамаанданан Кубокка республикаҕа элбэхтэ бастыыр сылларбытыгар кыайыыны аҕалыа диэн тарбахха баттыыр уолбут кини этэ”, диэн ахтар тренерэ Иван.
Сеня 2005 сыллаахха Танда орто оскуолатын ситиһиилээхтик үөрэнэн бүтэрбитэ. Үөрэнэр кэмнэригэр кылаас, оскуола чиэһин көмүскээн, элбэх спортивнай күрэххэ кыттара. Уол оҕо буолан, туох да үлэттэн толлубат, дьиэ ис-тас үлэтигэр төһүү күүс буолара. Тиэхиньикэҕэ олус сыһыаннааҕа. Оҕону кытта оҕо, кырдьаҕаһы кытта кырдьаҕас буолан, тэҥҥэ алтыһан, мэлдьи көмө-имэ буолара. Оҕо эрдэҕиттэн аҕыйах саҥалааҕа, сэмэйэ, холку майгылаага.
«Кини оскуолаҕа үөрэнэ сылдьан мас тардыьыынан үлүһүйэн туран дьарыктаммыта. Сеня оройуон, өрөспүүбүлүкэ күрэхтэһиилэригэр үгүстүк бириистээх миэстэлэргэ тиксэрэ. спортка бэриниилээҕэ элбэх ситиһиилэриттэн көстөр. Доҕотторугар тылын ылыннарара. Оскуолаҕа үөрэнэ сылдьыаҕыттан спортка көрдөрүүлэрэ биллэрдик үрдээбитэ. көхтөөҕө, олоххо актыыбынай позициялааҕа. Выпускпут биир саамай чаҕылхай үөрэнээччитинэн Сеня буолар. Кини кылгас олоҕор элбэҕи да ситиспитэ” диэн ахтар үөрэппит учуутала Петрусь Иванович Лыткин.
Оскуолатын бүтэрэн баран 2005с. Чурапчытааҕы физкультурнай институтка туттарсан киирбитэ. Үөрэҕин олус сөбулуурэ. Студенныыр сылларыгар эт – хаан өттүнэн өссө күүскэ сайдан, дьарыктанан, күрэхтэһэн, кыайыы өрөгөйүн элбэхтэ билэн олоҕун биир саамай чаҕылхай кэмнэрэ ааспыта. Бииргэ дьарыктанар да уолаттара Сунтаартан Федор Федоров, Тааттаттан Михаил Савватеев, Виктор Докалов, Мэҥэттэн Спартак Попов, Чурапчыттан Михаил Петров уо.д.а. Аны тренердэрэ Николай Быганов, Николай Барашков, Петр Саввин. Институт спортивнай завуһа Сергей Смирников. Семен үөрэнэр сылларыгар институт уолаттара буолар араас турнирдарга тоҕо анньан автобуһунан тиийэн кытталлара, күрэхтэһиини киэргэтэллэрэ. Сэмэн институтка үөрэнэр кэмигэр уонна кэлин үлэлии сылдьан мас тардыһыыга республика 3 төгүллээх Чемпиона, Манчаары Спартакиадатын Кыайыылааҕа, үрүҥ көмүс призера. Россия Чемпионатын мэтээлин толору кавалера. Европа Чемпиона. Россия, республика таһымнаах элбэх турнирдар кыайыылаахтара. Биир улахан кыайыыта 2003 сыллаах Хандыга Спортивнай оонньууларын Аар Дархана Александр Кузнецов бирииһигэр төрөөбүт дойдутугар Үөһээ Бүлүү Ороһутугар Республика бары ааттаахтара 74 киилэҕэ мустубуттара. Александр доҕотторо, аймахтара, биир дойдулаахтара кини ыйааһыныгар омук массыыната бириис туруорбуттара. Олус эрэллээхтик кыайан омук массыыната ылан үөрэн мүчүк гыммыт сирэйэ бу баар курдук. Сэмэн ити ситиһиилэринэн Саха Сирин уонна Россия спортун маастара.
Үөрэҕин ситиһиилээхтик бүтэрэн, Уус- Алдан улууһун баһаары утары охсуһар этэрээтин 1 нүөмэрдээх баһаарынай чааһыгар инструкторынан, онтон отделение командирынан үлэлээбитэ. Үлэтигэр олус бэриниилээх буолан МЧС“За заслуги” диэн 3 истиэпэннээх мэтээлинэн наҕараадаламмыта.
Түөрт сыл “Лучший пожарный” диэн номинация Хаһаайына. 2016 сыллаахха Өрөспүүбүлүкэ баһаарынайдарын икки ардыларыгар ыытыллар “Пожарно – прикладной” күрэххэ кыттан Дима Петуховтыын трехколенка кирилиэһинэн учебнай башня үһүс этээһин түннүгүнэн киириигэ олохтообут республика рекордун билигин да ким да куоһара илик. Уус Алдан баһаары утарар хамаандатыгар киирэн сэттэ төгүл республикаҕа бастаабыта.
Олоҕун аргыһын, тапталлааҕын, омук тылын учуутала Мэҥэ-Хаҥалас Дьаҥхаады нэһилиэгиттэн төрүттээх Лена Николаевна Стручкованы көрсөн 2010с. ыал буолбуттара. Алаһа дьиэ туттан, доҕорбут ситэ олорботох олоҕун салҕыыр кыыс, уол оҕолоохтор.
Доҕорбут Сэмэн Күн сырдыгын анныгар киниэхэ бэриллибит бириэмэтигэр, ханна да сырыттар суол хаалларардыы, аатын ааттатардыы олох олорон орто дойдуттан араҕыста. Дьылҕа хаан ыйааҕа кытаанаҕын хайыахпытый. Куруук өйдүү саныы. Олорон ааспыт чаҕылхай олоххун холобур оҥостуохпут. Ыччаттарга кэпсиэхпит, сырдатыахпыт турдаҕа.
Мас тардыһааччы доҕотторо
